Saleem Kausar
dil-e-simab-sifat phir tujhe zahmat dunga
dur-uftada zaminon ki masafat dunga
apne atraf naya shahr basaunga kabhi
aur ik shakhs ko phir us ki hukumat dunga
ik diya niind ki aghosh men jalta hai kahin
silsila khvab ka tuute to basharat dunga
qissa-e-sud-o-ziyan vaqf-e-mudarat hua
phir kisi roz mulaqat ki zahmat dunga
main ne jo likh diya vo khud hai gavahi apni
jo nahin likkha abhi us ki basharat dunga
ek safha kahin tarikh men khali hai abhi
akhiri jang se pahle tumhen mohlat dunga
Leave a Reply