Poet
rona vahi jo ḳhauf-e-ilahi se roiye
sona vahi jo us ke tasavvur men soiye
kapḌe safed dho ke jo pahne to kya hua
dhona vahi jo dil ki siyahi ko dhoiye
dahqan ki tarah daana zamin men na bo abas
bauna vahi jo tuḳhm-e-amal dil men boiye
khoya gaya hai shaiḳh qayamat ke vahm men
khona vahi ki aap ko aap hi men khoiye
‘hatim’ tu go ki ḳhaak hua kimiya kahan
hona vahi jo ḳhaak se iksir huiye
Leave a Reply