Safi Aurangabadi
na apne bas men hai rona na haa.e hans dena
koi rula.e to rona hansa.e hans dena
vo baton baton men bhar aana apni ankhon ka
vo us ka dekh ke surat ko haa.e hans dena
kisi ke zulm hain kuchh aise be-mahal ham par
ki ji men aata hai rone ki jaa.e hans dena
vo ḳhud hansa.e to kam-baḳht dil zidile dil
ye vaz.a-dari hai kyuun haa.e haa.e hans dena
udul-e-hukmi-e-dard-e-jigar ki ab ai chashm
jo laakh baar vo uTh kar rula.e hans dena
koi jo tujh pe hanse barq-pash alam-soz
to phir har ek pe tu bhuul jaa.e hans dena
vo ham se puchhte hain tum hamare ashiq ho
javab kya hai ab us ke siva.e hans dena
safi’ kahan ki shikayat kahan ka gham-ghussa
kisi ka ain laḌa.i men haa.e hans dena
Leave a Reply