Ahmad Faraz

Bhed Paen To Rah-E-Yar Mein Gum Ho Jaen

bhed paaen to rah-e-yar men gum ho jaaen

varna kis vaste bekar men gum ho jaaen

kya karen arz-e-tamanna ki tujhe dekhte hi

lafz pairaya-e-izhar men gum ho jaaen

ye na ho tum bhi kisi bhiid men kho jaao kahin

ye na ho ham kisi bazar men gum ho jaaen

kis tarah tujh se kahen kitna bhala lagta hai

tujh ko dekhen tire didar men gum ho jaaen

ham tire shauq men yuun khud ko ganva baithe hain

jaise bachche kisi tyauhar men gum ho jaaen

pech itne bhi na do kirmak-e-resham ki tarah

dekhna sar hi na dastar men gum ho jaaen

aisa ashob-e-zamana hai ki Dar lagta hai

dil ke mazmun hi na ashar men gum ho jaaen

shahryaron ke bulave bahut aate hain ‘faraz’

ye na ho aap bhi darbar men gum ho jaaen

Leave a Comment