rishton men bhi aa.i siyasat kaisi be-imani hai
hain saare alfaz shagufta lahje men virani hai
ho gaya mushkil kaise chhupa.un sar se le kar paanv talak
apni chadar phaT sakti hai aisi khincha-tani hai
us ko paane ki koshish men jaan tiri halkan hai kyuun
duniya andar se pital uupar sone ka paani hai
is hammam men sab nange hain kis pe uTha.e ungli kaun
apni apni chaukhaT hai apni apni peshani hai
main apne kamre men baiTha tanha tanha jalta huun
chhat par chham-chham naach rahi hai kaisi barkha raani hai
aate jaate lamhe us ko dekh rahe hain hairat se
taḳht banaya hai sone ka do din ki sultani hai
ham ne kiya ‘maqsud’ ḳhasare ka ye sauda jivan bhar
apne baare men nahin socha baat sabhon ki maani hai
Leave a Reply