ravana vo bhi hua hai na.e safar ke liye
talash karni hai roTi mujhe bhi ghar ke liye
dikha.i deta hai suraj bhi kuchh pareshan sa
udaas main hi nahin huun kisi shajar ke liye
safar pe ja.un main asbab aur kya le kar
ki teri yaad hi kaafi hai rahguzar ke liye
bichhaḌte vaqt udasi ka rang tha jin par
nazar ne bose bahut aise bam-o-dar ke liye
ghubar kab hai khula hai rafaqaton ka gulab
hua nahin hai koi ḳhat hai be-ḳhabar ke liye
madina chhoḌa to kuufa hua nasib hamen
ki hijraten hi milin ham ko umr-bhar ke liye
sipah-e-sham hamen aftab kahti hai
bulandiyan hain sinan ki hamare sar ke liye
Leave a Reply