ravan in paniyon par bulbule hain
sadaf gahre samundar men rakhe hain
shagufe phuTte hain naḳhl-e-dil par
mire bachche mujhe jab chumte hain
hava men titliyan uḌti hain ab bhi
abhi tak log hanste bolte hain
tumhen malum hai na in labon par
mire hisse ke kuchh bose paḌe hain
hamare saath rahte hain hamesha
baḌe achchhe hamare mas.ale hain
mire jehlam tire dariya ke ab bhi
miri ankhon se gahre rabte hain
zamin ko us ki miTTi saunpna thi
falak se is liye ham aa ga.e hain
ye kaise badshah-e-vaqt hain jo
mire ma.asum bachche marte hain
yahi avaz aati hai darun se
ham apni raah se bhaTke hue hain
Leave a Reply