raushni ke saz-o-saman DhunDhta phirta tha main
un dinon ik chand ki ta.amir men uljha tha main
aḳhiri manzar hi shab ka haath lag paaya mire
kal tiri mahfil men thoḌa der se pahuncha tha main
us purane ghar ki vo divar ab ke gir ga.i
haan vahi divar jis par ab talak likkha tha main
us ki bahon se nikal aaya bhi tha mera badan
aur us ke siine men ab tak kahin lipTa tha main
umr-bhar ki mushkilen hans kar ke main ne paar ki
ik ḳhushi mujh ko mili thi bas tabhi roya tha main
vo mire TuuTe hue kirchon ko kab tak joḌta
thoḌa thoḌa kar ke saare ghar men hi bikhra tha main
puchhiye mat kya sukun-e-mustaqil tha qabr men
muddaton ke ba.ad aisi niind men soya tha main
Leave a Reply