Poet
sabir-o-shakir rahe shadan rahe
ḳhush rahe jis haal men insan rahe
tum ko a.ine men kya aaya nazar
misl-e-a.ina jo tum hairan rahe
us mohabbat ka bura ho ishq men
chaar din bhi to na ham shadan rahe
the vo husn-o-ishq ke raz-o-niyaz
qaid zindan men mah-e-kan.an rahe
tum nahin ho to tumhari yaad hai
ḳhana-e-dil kis liye viran rahe
qatl kar ke ham ko vahin munfa.il
aur ham sharminda-e-ehsan rahe
mai se tauba us ghaTa men mohtasib
kyuun farishta ban ke har insan rahe
khil ke kaliyan de rahi hain ye sabaq
aadmi kanTon men bhi ḳhandan rahe
baagh men do din ko aa.i hai bahar
misl-e-shabnam koi kyuun giryan rahe
mere siine men jo the ulfat ke daagh
roz-e-raushan ki tarah taban rahe
kya haram kya dair hain jhagḌon ke ghar
un se ‘shankar’ duur hi insan rahe
Leave a Reply