un se dil milte hi furqat ki bala bhi aai
jaan aane bhi na paai ki qaza bhi aai
ab to tum gor-e-ghariban ko chalo be-parda
us ki shamon ko hava ja ke bujha bhi aai
hijr men arsh se nakam dua hi na phiri
na-rasa ho ke miri ah-e-rasa bhi aai
baat puuri na suni ham ne kabhi naseh ki
tok uthe apni samajh men jo zara bhi aai
pher li rukh se nazar us ne kis andaz ke saath
aaine men jo nazar apni ada bhi aai
dekh kar haal mira un se hansi ruk na saki
rokne ke liye har chand haya bhi aai
naash pe aa ke miri us ne vo baten chhedin
har azadar ko ibrat bhi haya bhi aai
nigah-e-shauq ne kya raz-e-nihan faash kiya
ham se parda bhi hua aaj haya bhi aai
nazaa men aa ke miri sirf ye puchha us ne
ab batao kisi masraf men vafa bhi aai
dil hi khasta na hua lashkar-e-gham ke hathon
balki is maarke men kaam dua bhi aai
daava-e-sehr-e-bayani hai abas ai ‘raghib’
‘mir’-sahib ki tumhen tarz-e-ada bhi aai
Leave a Reply