Raushni Ke Rup Mein KHushbu Mein Ya Rangon Mein Aa

Muzaffar Warsi

raushni ke ruup men ḳhushbu men ya rangon men aa

main tujhe pahchan lunga kitne hi chehron men aa

band ankhon men bhi kya hogi tiri be-pardagi

chhin le mujh se ye ninden ya mire ḳhvabon men aa

naach uThe raqqasa-e-jan dhaḌkanon ki thaap par

saaz hathon men uTha.e dil ke sannaTon men aa

tu jo sharmata hai mere samne aate hue

oḌh le mera tasavvur phir miri bahon men aa

kar diye hain zindagi ne muḳhtalif hisse mire

mujh se milna hai agar baT kar ka.i sayon men aa

shahr men bhi ḳhaak uḌati phir rahi hain vahshaten

chhoḌ virane ‘muzaffar’ ab gali-kuchon men aa