Azhar Ghauri
raushan na hui thi sub.h abhi munh khol rahi hai shaam kahin
aghaz na hone paaya tha aur hone laga anjam kahin
is duniya men kya milna hai bas armanon ke ḳhuun ke siva
ai ḳhvab-e-hasin tere chalte ho jaa.en na ham badnam kahin
manind-e-saba avara ham phirte hi rahe shahron shahron
ramta jogi bahta paani hai sub.h kahin to shaam kahin
is vaqt to ḳhush aate hain nazar kuchh sada-lauh anadil bhi
dekho to na phir phailaya ho sayyad ne koi daam kahin
sayyad se gar laḌna hai tujhe shahin ka jigar paida kar le
bulbul jaise nazuk dil se hota hai jari iqdam kahin
kuchh ziist ka gham kuchh millat ka maghmum rahe har dam ‘az.har’
hassas tabi.at valon ko milta hai bhala aram kahin
Leave a Reply