Koi Sazish Racho Zer-O-Zabar Ki Baat Mat Socho

Hamid Iqbal Siddiqui

koi sazish racho zer-o-zabar ki baat mat socho

riya-karon men tum apne hunar ki baat mat socho

ye hijrat thi muqaddar lazmi tha chhuTna sab kuchh

marasim rabte ghar aur nagar ki baat mat socho

sabab koi bhi ho lekin lahu taqsim hona tha

ye sarhad hai idhar tum ho udhar ki baat mat socho

yahi ik koThari apne liye angan hai baiThak hai

agar is shahr men jiina hai ghar ki baat mat socho

tumhare saare mansubon ka naslon par ahata hai

sada aati hai umr-e-muḳhtasar ki baat mat socho

mizajon par garan ho koi lekin rabta rakhna

yahi tahzib hai is se mafar ki baat mat socho

ye mumkin hai ḳhizan ke ba.ad bhi mausam na raas aa.e

to aisa bhi nahin barg-o-samar ki baat mat socho