rasta sunsan tha to muḌ ke dekha kyuun nahin
mujh ko tanha dekh kar us ne pukara kyuun nahin
dhuup ki aghosh men leTa raha main umr bhar
mehrban tha vo to misl-e-abr aaya kyuun nahin
ek panchhi der tak sahil pe manDlata raha
muztarib tha pyaas se lekin vo utra kyuun nahin
qurb ki qaus-e-quzah kamre men bikhri thi magar
raat bhar rang-e-tamanna phir bhi nikhra kyuun nahin
mujh ko patthar men badalte chahe ḳhud ban jaate vo mom
ḳhvahish-e-tifl-e-tamanna ko jagaya kyuun nahin
us ko tanha pa ke ‘aslam’ raat apne room men
qatra-e-ḳhun-e-havas a.ankhon men aaya kyuun nahin
Leave a Reply