Rakhe Hai Rang Kuchh Saqi Sharab-E-Nab Aatish Ka

rakhe hai rang kuchh saaqi sharab-e-nab atish ka

muqattar kya kiya le kar gul-e-shadab atish ka

mire ye garm aansu ponchh mat dast-e-nigarin se

ki un ankhon se rahta hai ravan sailab atish ka

tah-e-mizhgan nihan rakhte hain ham lakht-e-dil-e-sozan

yahan khashak men rakkha hai akhgar daab atish ka

nigah-e-garm se us ki dil-e-betab ru-kash hai

harif akhir hua ye para-e-simab atish ka

jo sail-e-ashk o ah-e-garm ko tuk dijiye rukhsat

nishan dariya ka gum ho naam ho nayab atish ka

shakeb o taab o hosh o sabr soz-e-gham se sab sulga

hua toama gharaz apna tamam asbab atish ka

araq us shola-gun aariz pe kya suna-e-ilahi hai

nahin dekha hai ham ne rabt baham aab atish ka