Ghulam Husain Sajid
miri virasat men jo bhi kuchh hai vo sab isi dahr ke liye hai
ye rang ik ḳhvab ke liye hai ye aag ik shahr ke liye hai
agar isi raat ki siyahi ke saath kho ja.enge sitare
to phir ye mere lahu ka raushan charagh kis lahr ke liye hai
tulu-e-imkan-e-arzu par yaqin rakhti hai ek duniya
magar ye be-kar ḳhvahishon ki numud ik zahr ke liye hai
kanar-e-dariya hai ek maddham ghubar kis dasht ka paḌav
darun-e-sahra ye ab-e-haivan ka naqsh kis nahr ke liye hai
ye ḳhvab hote hue sahifon ke phuul mere liye hain lekin
zamin-e-dil par ye ayaton ka nuzul ik dahr ke liye hai
bas ek insan ki ḳhushi hai kisi haqiqat ki ru-numa.i
magar kisi ḳhvab ke ziyan ka malal ik shahr ke liye hai
agar hai insan ka muqaddar ḳhud apni miTTi ka rizq hona
to phir zamin par ye asman ka vajud kis qahr ke liye hai
Leave a Reply