is darja meri zaat se us ko hasad hua
jo bhi saval main ne kiya mustarad hua
us ne hi di saza mujhe sahra ki dhuup men
mere badan ki chhanv se jo na-balad hua
aisi chali hava ki har ik shaḳh jal ga.i
vo peḌ jo hara tha ghamon ki sanad hua
sochen hain ḳhvab-ḳhvab to tahrir ab-ab
ham kya kahen ki kaun yahan nek-o-bad hua
us ki hi aarzu men ye chehre udaas hain
vo aa.ina ki jis ka taqaza ashad hua
jis ne sadaqaton ko lahu se kiya raqam
us shaḳhs ka har ek suḳhan mustanad hua
mera sitara us ke sitare se yuun mila
mera aur us ka naam ‘hasan’ ham-adad hua
Leave a Reply