Rah-E-Wafa Pe Kam Hain KHasare Hamare Dost

rāh-e-vafā pe kam haiñ ḳhasāre hamāre dost

haiñ is safar ke apne sitāre hamāre dost

kuchh saañp chāhiye the ḳhazāne ke vāste

itne meñ āstīñ se pukāre hamāre dost

ik din sambhal hī jaatā hai duniyā se haarā shaḳhs

lekin jo apne-āp se haare hamāre dost

dushman kī ham ko koī zarūrat nahīñ paḌī

kīna-ba-sīna phirte haiñ saare hamāre dost

ham ne ġhazal kī oT se sab kuchh batā diyā

lekin samajh na paa.e ishāre hamāre dost

Leave a Comment