rah-e-vafa men hamen jitne ham-khayal mile
un hi ki ankhon men ham ko kai saval mile
vo log jin ki hamen fikr rahti hai har dam
vo jab kabhi bhi mile ham se hasb-e-hal mile
kisi gharane kisi zaat se nahin matlab
ye ham bhi jante hain dil mile khayal mile
main kis tarah se pareshan-hal unhen samjhun
vo apne husn-e-amal se to mala-mal mile
bahut se log mile ham ko apni duniya men
koi na samjha bahut yuun to ham-khayal mile
‘kiran’ vo pichhle dinon ki to baat aur hi thi
agarche milne ko yuun kitne mah-o-sal mile