un ki yadon ki hasin parchha.iyan rah ja.engi
dil ko Dasne ke liye tanha.iyan rah ja.engi
ham na honge phir bhi bazm-ara.iyan rah ja.engi
apni shohrat ke liye rusva.iyan rah ja.engi
ham ḳhala ki vus.aton men is tarah kho ja.enge
duur tak bikhri hui tanha.iyan rah ja.engi
miT na pa.enge kisi surat bhi maazi ke nuqush
dil ki divaron pe kuchh parchha.iyan rah ja.engi
ham musafir hain nikal ja.enge har basti se duur
aur ham ko DhunDhti purva.iyan rah ja.engi
phuul se ḳhushbu ki surat ham juda ho ja.enge
ye baharen ye chaman-ara.iyan rah ja.engi
misl-e-naghma ham faza men jazb ho ja.enge ‘arsh’
gungunati gunjti shahna.iyan rah ja.engi
Leave a Reply