Pirzada Qasim
uTh raha hai ashiyanon se dhuan dekhega kaun
hai magar ta.abir ḳhvab-e-ra.egan dekhega kaun
jal rahi hai dil men ik afaq se rishte ki lau
jaise ham dekhe hain su-e-asman dekhega kaun
tu bahut a.indagan ka khinchta hai intizar
be-ḳhabar vo raunaq-e-a.indagan dekhega kaun
ek ehsas-e-shikast-e-shab bahut raushan magar
be-karan is be-hisi ke darmiyan dekhega kaun
aarzu ka ik jahan-e-taza bhi manzar men hai
main jise pahchanta huun vo jahan dekhega kaun
raste raushan bahut karta raha huun zer-e-pa
duur tak phaile hain qadmon ke nishan dekhega kaun
daad jankahi ki kis se paa.en ab ahl-e-hunar
ḳhun-chakida ḳhama risti ungliyan dekhega kaun
dekhte hain sab furu-e-shauq ki zeba.ishen
kam nahin kuchh ye ma.al-e-shauq haan dekhega kaun
rafta rafta ho rahega zaḳhm-e-dil ka indimal
bujhte bujhte bujh hi ja.egi fughan dekhega kaun
dekh dil men ho raha hai ik naya manzar tulua
jo idhar bikhri paḌi hai kahkashan dekhega kaun
Leave a Reply