rah-e-firaq kisi taur muḳhtasar kiije
jo ho sake to kabhi ḳhvab se guzar kiije
hamare dil men bhi manzar ajiib sair ka hai
na aa saken to bulandi se hi nazar kiije
yahan pe charon taraf hai suragh raston ka
par iḳhtiyar koi raah dekh kar kiije
ye shahar-o-koh-o-bayaban-o-dasht-o-dariya the
ab aage ḳhvab hai ruk ja.iye basar kiije
bane the ḳhaak se ham ko qayam karna tha
hava hain aap uḌa kijiye safar kiije
ham apne ahd-e-tamanna pe ab bhi qaa.em hain
zara sharik-e-tamanna ko bhi ḳhabar kiije
Leave a Reply