Peer Akram
raat ke andhe darichon ko munavvar dekhte
ham khuli a.ankhon se jo ḳhvabon ke manzar dekhte
band rakkhe ḳhud hamin ne jab sabhi divar-o-dar
kis tarah phir jhank kar us ghar ke andar dekhte
kab hamare haath aa.iin ḳhvahishon ki titliyan
umr guzri bas yunhi rangon ke paikar dekhte
mauja-e-tufan men utre ahl-e-dil be-iḳhtiyar
sahilon par rah ga.e saare shanavar dekhte
zindagi ki gahmagahmi ne ye fursat hi na di
ham hatheli par likha apna muqaddar dekhte
sahilon ki ret hi se chun rahe ho sipiyan
tum kabhi ‘akram’ samundar men utar kar dekhte
Leave a Reply