raat gahri hai to phir gham bhi faravan honge
kitne bujhte hue taare sar-e-mizhgan honge
qahr hai saat-e-mahshar hai ki kohram-e-fana
khaak is shahr-e-fana-kosh men insan honge
shahr ho dasht ho mahfil ho ki virana ho
ham jahan jaaen vahi khar-e-mughilan honge
kaise is shahr-e-kharabi men basar ki ham ne
kal jo aenge vo angusht-ba-dandan honge
shaam se dil men tarazu hai koi tir-e-sitam
raat guzregi na khvabon ke shabistan honge
diid ka bar-e-amanat na uthega us shab
khun-chakan subh talak dida-e-hairan honge
fikr mahbus hui harf-e-dua gung hua
ahl-e-iman-o-nazar khak-ba-daman honge
Leave a Reply