Poet
qahr hua ghazab hua shor hai lala-zar men
aag lagi bahar men aag lagi bahar men
apna ma.al-e-zindagi phulon ko dekh kar samajh
aaj ḳhizan-nasib hain kal jo khile bahar men
dagh-e-jigar ke phuul men phuul sada-bahar ke
rahta hai rang ek saan in ka ḳhizan bahar men
is husn is shabab par naz-o-ghurur is qadar
aaj hai aur kal nahin aap hain kis shumar men
mere gunah bhi bahut rahmat-e-kirdgar bhi
ye bhi nahin shumar men vo bhi nahin shumar men
kis ki ziya tiri ziya kis ki jhalak tiri jhalak
anjum-o-mehr-o-mah men barq men nur-o-nar men
taḌpen na ham to kya karen dekh kar us ko ik nigah
hon bijliyan bhari hui jis chashm-e-sehr-kar men
yar-o-aziz-o-aqraba ka ye suluk ba.ad-e-marg
dosh-ba-dosh le chale chhoḌne mujh ko ghaar men
ḳhal-o-ruḳh-e-habib ki jalvagari ke samne
chand hai kis qatar men taare hain kis shumar men
din shahid-e-naz ka kis kis jagah hai jalva-rez
kuchh hai shafaq men aur kuchh shamil hai lala-zar men
apne gunah pe sharmsar dekh ke mujh ko roz-e-hashr
rahmat-e-haq ne le liya ‘sabir’ mujhe kanar men
Leave a Reply