Imam Bakhsh Nasikh
mai se raushan rahe ayagh apna
gul na ho saqiya charagh apna
hijr men tar ho kya dimagh apna
khushk lab aap hai ayagh apna
nikhat-e-zulf jab se aai hai
nahin milta hamen dimagh apna
kis ki ham justuju men nikle the
nahin paate kahin suragh apna
kya hai mazkur-e-marham-e-kafur
jab namak sauda ho na daagh apna
hai shab-e-hijr vadi-e-vahshat
dida-e-ghul hai charagh apna
rat-din gul-rukhon se sohbat thi
yaad aata hai khana-bagh apna
so raha jo lipat ke vo gul-e-tar
dil hua aaj bagh-bagh apna
barg-e-gul saaf ban gaya phaha
kya moattar hua dimagh apna
Leave a Reply