raat aati hai to taqon men jalate hain charagh
ḳhvab zinda hain so ankhon men jalate hain charagh
andhiyan ab hamen mahsur kiye baiThi hain
ab to ham sirf ḳhayalon men jalate hain charagh
Thokaren khate hue umr kaTi apni so ham
dusron ke liye rahon men jalate hain charagh
tanz karta hua guzra tha hava ka jhonka
tab se ham tez havaon men jalate hain charagh
tishna-lab a.enge dariyaon ke Thukra.e hue
isi baa.is to sarabon men jalate hain charagh
ḳhvab bikhre hain hamare yahan har gaam so ham
shaam hote hi ḳharabon men jalate hain charagh
Leave a Reply