qurbat-e-husn men bhi dard ke asar mile
chara-gar ishq ke marham ke talabgar mile
dast-o-pa apne to vabasta-e-zanjir sahi
ik tamanna thi koi sahab-o-muḳhtar mile
haan junun-ḳhezi-e-dil rehn-e-masarrat na hui
ḳhush hui vahshat-e-gham jab rasan-o-dar mile
ḳhaak uḌa.en ki na.e shahr basa.en yaaro
ham ba-har-rang har ik shauq se bezar mile
ham hain is kar-gah-e-shisha-garan men hairan
aa.ine tab-e-nazara ke talabgar mile
shauq-e-be-minnat-e-ehsan-e-digar kya kahiye
ḳhud se is shauq men ham bar-sar-e-paikar mile
dasht-e-majnun tha koi tesha-farhad koi
ishrat-e-marg sahi hila-e-be-kar mile
ḳhvahish-e-marg dar-e-yar-e-tamanna hi sahi
sar magar dosh pe ham ko bhi giran-bar mile
shab qayamat si guzar jaati hai tanha.i men
baḳht-yavar hai jise dida-e-bedar mile
apne ham-sa.e men vo hai jise dekha bhi nahin
aise ham-sa.e ki divar se divar mile
Leave a Reply