Qarar Hote Hue Be-Qarar Yani Main

Iftikhar Haidar

qarar hote hue be-qarar ya.ani main

tumhare hijr ka ik sogvar ya.ani main

vatan se duur vatan ka muqim ya.ani tu

vatan men rah ke gharib-ud-dayar ya.ani main

sarapa kibr va sarapa ghurur ya.ani tu

tire ghurur pe har dam nisar ya.ani main

vafa-o-mehr-o-mohabbat ka naam ya.ani tu

vafa-o-mehr-o-mohabbat shi.ar ya.ani main

har ik amal se mire be-niyaz ya.ani tu

niyaz-o-nazr dil-o-jan-guzar ya.ani main

ummid-e-amad-e-sub.h-e-bahar ya.ani tu

aur is bahar ka umid-var ya.ani main

suḳhan men taaza ḳhayalon ki mauj ya.ani tu

suḳhan ko ba.is-e-sad-iftiḳhar ya.ani main