qaidi huun sar-e-zulf-e-girah-gir se pahle
paband huun paidaish-e-zanjir se pahle
sar-gashta huun daur-e-falak-e-pir se pahle
gardish men huun main gardish-e-taqdir se pahle
kya laati hai teri nigah-e-qahr ka muzhda
daude hue aati hai ajal tiir se pahle
nalon se unhen hoti hai nafrat evaz-e-lutf
taqdir bigad jaati hai tadbir se pahle
maara hai mujhe khanjar-e-abru se kisi ne
nahlaiyo ab-e-dam-e-shamshir se pahle
ghar se tire divane ne jab paanv nikala
chhalon ne qadam le liye zanjir se pahle
kis tarah kahun aap ke honton ki halavat
lab band hue jaate hain taqrir se pahle
paband-e-gham-e-zulf ka marna na chhupega
pahunchegi khabar nala-e-zanjir se pahle
kis hausle par talib-e-didar hai aalam
ankhen to lada le koi tasvir se pahle
be-tab hue yaar ki chutki se nikal kar
tiir aap tadapne lage nakhchir se pahle
paane ki nahin dil ka thikana khalish-e-gham
jab tak na pata puchhe tire tiir se pahle
ghabrane se kya kaam ‘munir’-e-jigar-afkar
tu arz to kar hazrat-e-shabbir se pahle
Leave a Reply