Sameena Raja
vo gham qubul hai jo tiri chashm se mile
ham ko hunar tamam usi zaḳhm se mile
raushan hai saari zindagi is dil ki aag se
aur dil ko aanch ik suḳhan-e-garm se mile
jab rang-o-nur-o-naghma nahin iḳhtiyar men
ik e’tibar-e-shauq hi us bazm se mile
dil ko lapeT leta hai ik reshmin ḳhayal
jab bhi nigah us nigah-e-narm se mile
is dil ke saare ḳhvab mohabbat ke sab gulab
ik sher se khile kabhi ik nazm se mile
hamrah chal raha tha falak bhi tamam shab
yuun ahal-e-ḳhak-o-ḳhvab mah-o-najm se mile
dil men to un ki aab koi dekhta na tha
durr-e-samin the jo dar-chashm se mile
Leave a Reply