qaid-e-gham-e-hayat se ham ko chhuḌa liya
achchha kiya ki aap ne apna bana liya
hone diya na ham ne andhera shab-e-firaq
bujhne laga charagh to dil ko jala liya
duniya ke paas hai koi is tanz ka javab
divana apne haal pe ḳhud muskura liya
kya baat thi ki ḳhalvat-e-zahid ko dekh kar
rind-e-gunahgar ne sar ko jhuka liya
chup huun tumhara dard-e-mohabbat liye hue
sab puchhte hain tum ne zamane se kya liya
na-qabil-e-bayan hain mohabbat ki lazzaten
kuchh dil hi janta hai jo dil ne maza liya
roz-e-azal paḌi thi hazaron hi nematen
ham ne kisi ka dard-e-mohabbat uTha liya
baḌhne lagi jo talḳhi-e-gham-ha-e-zindagi
thoḌa sa bada-e-gham-e-janan mila liya
vaqif nahin giraft-e-tasavvur se vo ‘shamim’
jo ye samajh rahe hain ki daman chhuḌa liya
Leave a Reply