qad baḌhane ke liye baunon ki basti men chalo
ye nahin mumkin to phir bachchon ki basti men chalo
sabr ki chadar ko oḌhe ḳhvab-gahon men raho
sach ki duniya chhoḌ kar va.adon ki basti men chalo
jab bhi tanha.i ke hangamon se dam ghuTne lage
bhiiḌ men gum ho ke an-janon ki basti men chalo
Daal rakkhi hai ḳhirad-mandon ne chehron par naqab
is liye kahta huun divanon ki basti men chalo
ungliyon ki zarb se saz-e-sukun ko toḌ kar
jab junun had se baḌhe, rishton ki basti men chalo
ik tumhari ye qayadat mo’tabar rah ja.egi
haath men patthar liye shishon ki basti men chalo
bhiiḌ se ‘azam’ yahan milna-milana chhoḌ kar
martaba ke vaste pardon ki basti men chalo
Leave a Reply