Bismil Allahabadi
qabil-e-sharh mira hal-e-dil-e-zar na tha
sunne vaale to bahut the koi gham-ḳhvar na tha
ab vo jiine ke liye soch raha hai tadbir
apne hathon jise marna kabhi dushvar na tha
mujh se puchho to qaza us ki hai maut us ki hai
dosh-e-ahbab pe jo mar ke giran-bar na tha
chunte the baagh men aa aa kar unhen ahl-e-junun
ashiyan ka mire tinka koi bekar na tha
ye hamin ne to mohabbat ki nikalin rasmen
aap par marne ko pahle koi tayyar na tha
dam-e-sayyad men azad raha shikva-e-gham
main giraftar tha lekin ye giraftar na tha
ab unhen samne aane men hai uzr ai ‘bismil’
milne-julne se jinhen peshtar inkar na tha
Leave a Reply