Achchhe Lafzon Se Nawaze Ya Wo Ruswai Kare

Niyaz Husain Lakhwera

achchhe lafzon se navaze ya vo rusva.i kare

us ko haq hai ki bura.i kare achchha.i kare

pyaar to soch ki divar hila deta hai

kaun is zehn ke dushman se shanasa.i kare

haath se haath jhaTak de ki use thame rakhe

us ko azadi hai jab chahe vo ji aa.i kare

kya ḳhabar ḳhud ko hi ab bechna paḌ jaa.e yahan

kis ko ma.alum sitam kaise ye mahnga.i kare

karb zanjir ki manind jakaḌ leta hai

bhaa.i ko sahna hi paḌta hai agar bhaa.i kare

main ne zehnon se qadamat ko khurach Daala he

shahr ka shahr mire dar pe jabin-sa.i kare

pyaar ruhon men kashish ban ki dhaḌakta hai ‘niyaz’

ye vo jazba hai jo pal-bhar men shanasa.i kare