ghair-mumkin hai ki miT jaa.e sanam ki surat
dil ka ye naqsh nahin naqsh-e-qadam ki surat
raat bimar pe bhari hai kahin tar-e-nafas
TuuT jaa.e na tire qaul-o-qasam ki surat
mai-kasho ḳhuub piyo itna magar hosh rahe
jaam chhalke na kabhi dida-e-nam ki surat
ham sa bad-baḳht zamane men koi kya hoga
ham ko ḳhushiyan bhi milin dard-o-alam ki surat
kaun hai jis se hamen pyaar ke do bol milen
aaj ke log hain patthar ke sanam ki surat
fikr-o-ehsas ki anchon se pighal kar ‘vahid’
misl-e-shamshir hui apne qalam ki surat
Leave a Reply