Basir Sultan Kazmi
hamare saath zamana kiya kare kuchh bhi
zara malal na ho tu na gar kahe kuchh bhi
vo aur vaqt the jab intiḳhab mumkin tha
karenge ahl-e-hunar kaam ab mile kuchh bhi
nahin hai vaqt mire paas har kisi ke liye
miri bala se vo hote hon aap ke kuchh bhi
jo mera haq hai mujhe vo to dijiye sahab
talab kiya nahin main ne janab se kuchh bhi
zara si baat pe tera ye haal hai ‘basir’
abhi to main ne bataya nahin tujhe kuchh bhi
Leave a Reply