Dar-O-Diwar Pe Shaklen Si Banane Aai

dar-o-divar pe shaklen si banane aa.i

phir ye barish meri tanha.i churane aa.i

zindagi baap ki manind saza deti hai

rahm-dil maan ki tarah maut bachane aa.i

aaj kal phir dil-e-barbad ki baten hain vahi

ham to samjhe the ki kuchh aql Thikane aa.i

dil men aahaT si hui ruuh men dastak gunji

kis ki ḳhush-bu ye mujhe mere sirhane aa.i

main ne jab pahle-pahal apna vatan chhoḌa tha

duur tak mujh ko ik avaz bulane aa.i

teri manind tiri yaad bhi zalim nikli

jab bhi aa.i hai mira dil hi dukhane aa.i