pyaas ko dariya raha aur ḳhaak ko sahra raha
is ke ma.ani ye hue ke ye safar achchha raha
ab main Duuba tab main Duuba bas isi ummid men
ik samundar paas mere rat-bhar baiTha raha
main koi manzil nahin tha miil ka patthar tha bas
ba.ad mere bhi musalsal rasta chalta raha
ek aahaT aa ke mere dar se vapas ho ga.i
aur main kanon ko takiye se daba sota raha
sun liya tha ek din ik saans hogi aḳhiri
aur phir har saans pe us saans ka dhaḌka raha
ik zara hazrat ne sab kuchh hi badal kar rakh diya
jo kabhi ik shaḳhs tha ab vo faqat chehra raha
zindagi ab aur koi gham diya to dekhiyo
ḳhaak kar dunga tujhe main ye mira va.ada raha
Leave a Reply