purane doston se ab muravvat chhoḌ di ham ne
muazzaz ho ga.e ham bhi sharafat chhoḌ di ham ne
mayassar aa chuki hai sar-bulandi muḌ ke kyuun dekhen
imamat mil ga.i ham ko to ummat chhoḌ di ham ne
kise ma.alum kya hoga ma.aal a.inda naslon ka
javan ho kar buzurgon ki rivayat chhoḌ di ham ne
ye mulk apna hai aur is mulk ki sarkar apni hai
mili hai naukri jab se baghavat chhoḌ di ham ne
hai utna vaqi.a us se na milne ki qasam kha li
ta.assuf is qadar goya vazarat chhoḌ di ham ne
karen kya ye bala apne liye ḳhud muntaḳhab ki hai
gila baaqi raha lekin shikayat chhoḌ di ham ne
sitare is qadar dekhe ki ankhen bujh ga.iin apni
mohabbat is qadar kar li mohabbat chhoḌ di ham ne
jo socha hai azizon ki samajh men aa nahin sakta
shararat ab ke ye ki hai shararat chhoḌ di ham ne
ulajh paḌte agar to ham men tum men farq kya rahta
yahi divar baaqi thi salamat chhoḌ di ham ne
gunahgaron men shamil mudda.i bhi aur mulzim bhi
tira insaf dekha aur adalat chhoḌ di ham ne
Leave a Reply