Roohi Kanjahi
pur-haul ḳharabon se shanasa.i miri hai
hangame agar tere hain tanha.i miri hai
ai husn tu har rang men hai qabil-e-izzat
main ishq huun har haal men rusva.i miri hai
jo sat.h pe hai teri rasa.i hai usi tak
fankar huun main ziist ki gahra.i miri hai
hasti ke ujale hain miri aankh ka partav
har chashma-e-pur-nur men bina.i miri hai
har naqsh-e-hasin hai miri kavish ka natija
har manzar-e-dilkash men tavana.i miri hai
sha.er huun sadaqat ka parastar huun ‘ruhi’
har rang men har daur ki sachcha.i miri hai
Leave a Reply