pila raha hai zamin ko yahan lahu koi aur
magar hain phuul kisi ke hai surḳh-ru koi aur
tiri talab thi so ham daar tak chale aa.e
ab aarzu koi baaqi na justuju koi aur
ye ittifaq nahin hai ki qatl ho jaa.e
tiri kahani men mujh sa hi hu-ba-hu koi aur
hamesha banti hui baat ko bigaḌte hain
kabhi kabhi to main ḳhud hi kabhu kabhu koi aur
kamal-e-vahdat-o-kasrat main roz dekhta huun
ki tu hi to mire andar hai char-su koi aur
main apne aap se ḳhud jit.ta huun harta huun
nahin hai mere alava mira adu koi aur
ye sha.iri men hai yakta muḳhalifat men vo taaq
na aur koi ‘yagana’ na lucknow koi aur
jahan-e-hasil-e-kun Thiik hai magar ‘tariq’
mujhe banani hai duniya-e-rang-o-bu koi aur
Leave a Reply