Jaleel Aali
barg bhar baar mohabbat ka uThaya kab tha
tum ne siine men koi dard basaya kab tha
ab jo ḳhud se bhi juda ho ke phiro ho ban men
tum ne basti men koi dost banaya kab tha
naqd-e-ehsas ki insan ka bharam hota hai
ham ne khoya hai kahan aap ne paaya kab tha
shahr ka shahr umaD aaya hai dil-jui ko
dushmanon ne bhi tiri tarah sataya kab tha
sa.i-e-sahra-e-vafa sair-e-gulistan kab thi
dhuup hi dhuup thi har-su koi saaya kab tha
aks kya kya the nigahon men firozan ‘ali’
par ye andaz-e-nazar vaqt ko bhaya kab tha
Leave a Reply