pairahan-e-rangin se sho.ala sa nikalta hai
ma.asum hai kya jaane daman kahin jalta hai
meri mizha-e-gham par larzan hai haqiqat si
un ke lab-e-la.alin par afsana machalta hai
achchhi hai rahe thoḌi ye jalva-tarazi bhi
raqs-e-mah-o-anjum men divana bahalta hai
unvan-e-taraqqi hai ye tira-fiza.i bhi
kuchh gard bhi uThti hai jab qafila chalta hai
hai shaam abhi kya hai bahki hui baten hain
kuchh raat Dhale saaqi mai-ḳhana sambhalta hai
bas dekh chuki duniya ye bazm-farozi bhi
rakkha hai charagh aisa bujhta hai na jalta hai
ik sehr-e-shabistan hai ye fann-e-jahan-rani
duniya hai ki soti hai jaadu hai ki chalta hai
aflas ke aansu se tufan bhi larazte hain
sho.alon ka jigar goya shabnam se dahalta hai
mutrib-ba-lab-e-la.alin saqi-ba-mai-o-mina
is garmi-e-mahfil men iman pighalta hai
Leave a Reply