Hafeez Merathi
pi kar chain agar aaya bhi kitni der ko aa.ega
nashsha ik avara panchhi chahkega uḌ ja.ega
manzar ki takmil na hogi tanha mujh se fankaro
dukh ke giit to main ga dunga aansu kaun baha.ega
ek saḳhi ko apna samajh kar arz-e-hal ki Thani hai
bairi dil kahta hai pagle kaasa bhi chhin ja.ega
mera samundar-par safar par jaana ek qayamat hai
jaise har chehre pe likha ho mere liye kya la.ega
jaate jaate puchh raha hai amn ke rakhvalon se ‘hafiz’
kyuun ji kya ham logon se meraTh ḳhali ho ja.ega
Leave a Reply