phuTe Man Se Bol, Laga Ye Zinda Hun Main

phūTe man se bol, lagā ye zinda huuñ maiñ

ab mujh ko ehsās huā ye zinda huuñ maiñ

yaaro mere naam pe ronā band karo tum

duur haTāo ab majma.a ye zinda huuñ maiñ

āñkheñ mal mal kar dekhā qātil ne mujh ko

sach niklā us kā ḳhadsha ye zinda huuñ maiñ

maiñ tasdīq karūñgā tere garm lahhū kī

tū bhī mujh ko yaad dilā ye zinda huuñ maiñ

mujh par merī zaat udhār hai lekin ‘saurabh’

chuktā kar dūñgā qarza ye, zinda huuñ maiñ

Leave a Comment