Akhtar Saeed Khan
phirti hai zindagi janaza-ba-dosh
but bhi chup hain ḳhuda bhi hai ḳhamosh
koi meri tarah jiye to sahi
zindagi dar-gulu ajal bar-dosh
didani thi ye ka.enat bahut
ham bhi kuchh din rahe ḳharab-e-hosh
ghar se tauf-e-haram ko nikla tha
raah men thi dukan-e-bada-farosh
ik ta.alluq qadam ko raah se hai
main na avara huun na ḳhana-ba-dosh
ham se ghafil nahin hain ahl-e-sitam
ik zara thak ke ho ga.e hain ḳhamosh
ji men hai koi aarzu kiije
ya.ani baaqi hai sar men masti hosh
hai ye duniya bahut vasi.a to ho
main huun aur tera halqa-e-aghosh
dil ko rote kahan talak ‘aḳhtar’
aḳhir-kar ho ga.e ḳhamosh
Leave a Reply