Alok Mishra
phir tiri yadon ki phunkaron ke biich
nim-jan hai raat yalgharon ke biich
unghta rahta hai aksar mahtab
raat bhar ham chand be-daron ke biich
gunjti rahti hai mujh men dam-ba-dam
chiḳh jo ubhri na kohsaron ke biich
dekhta aḳhir main us ko kis tarah
raushni ki tez bauchharon ke biich
kho hi jaata huun tire qisse men main
barha gumnam kirdaron ke biich
ek adna sa diya hai aftab
mere man ke gahre andhiyaron ke biich
qaid se apni nikalte kyuun nahin
zaḳhm kab bharte hain divaron ke biich
sanehe chhapne lage hain ankhon men
nabz tham jaa.e na aḳhbaron ke biich
tha mahavaT aur phir juḌvan bahav
bah gaya main gungune dharon ke biich
Leave a Reply