Maher Chand Kausar
phir mujhe hausla-e-arz-o-bayan mil jaa.e
kuchh dinon ke liye mujh ko bhi zaban mil jaa.e
samna hoga to kuchh kah na sakenge us se
jaane us bhiiḌ men vo shoḳh kahan mil jaa.e
ajnabi gaanv men phirta huun ye ummid liye
chhanv darkar hai thoḌi si jahan mil jaa.e
kya tamasha hai ki main qasd-e-nasheman le kar
ghar se niklun to mujhe barq-e-tapan mil jaa.e
vahin aa jaata hai nakami-e-qismat ka ḳhayal
suud ki dil men tamanna ho ziyan mil jaa.e
kaash qasid ko mira haal sunane ke liye
chand lamhon ke liye meri zaban mil jaa.e
mere ash.ar huun maqbul-e-zamana ‘kausar’
mujh ko aisa kahin andaz-e-bayan mil jaa.e
Leave a Reply