Munawwar Lakhnavi
phir kya tha jo parde men tha rusva to nahin tha
tha raz-e-mohabbat magar ifsha to nahin tha
tum jurm-e-vafa par jo ho amada-e-tazir
ye sirf mire dil ka taqaza to nahin tha
kya soch ke aa.i thi use dekhne ḳhilqat
kuchh ma.arka-e-ishq tamasha to nahin tha
kyuun aa ke mire gham ka sahara hui ummid
imroz ka gham tha gham-e-farda to nahin tha
phir kis liye ma.atub zamana tha ‘munavar’
kahta na ghazal soch ke aisa to nahin tha
Leave a Reply